حكاوي علي وتر الراوي
وبحب الأرض المولود فيها
أتمرغ جوه ترابها
تعشقني الكلمه تاخدني اديها
اشرب واتفرع من شريانك
تتحرك كل عروقي وتنبض
يتشرب عرقي بدفء حنانك
الاقيني بمد اديه
لجدور الشجر الساكن
مرفوض اللون الأسود
لو يبقي الأسود داكن
من زرع الخضره علي جبينك
بلقاني عيونك
وياخدني الرمش ونام ف جفونك
احلم اني بعيش في الجنه
اتمشي في وسط غيطانك
تتلون ايدي بشجر الحنه
وعروسه بتوبها الأبيض
زى الليل الصاحي في ضوء قمرايه
ونجومها مواكب
ويدقوا دفوف
ويشاركوا الفرحه معايه
علي مسطبة الفلاح العطشان للقله
والكنكه وبراد الشاى
والراكيه المنقاده بخشب الصفاف
والنغمة وصوت الناي
تلقاهم يحكوا حكاوي
علي وتر الراوي
ويهز الراقص غناوي
ترسمها ملامحك بسمه
وبكام البسمه تساوي
يا عيدان السنابل والدره
يا مشتاقه لحضن الرحايه
كيف تدور السواقي
من غير هدف أو غايه
غريب الدار
مله من شطك الجره
راح الولد يمنعه
غفر الحواري
طردوا الولد بره
صرخت بعلو صوتي
لو كان حيشرب ميتي
حتكون ميتي مره
يا جراد الأرض
يا زاحف علي أرضي
لجل ما تاكل في طولي وف عرضي
ورق الشجر
لسه بيطلع بردي
والمدنه رافعه راسها
ويسجد وسبح وكبر
والأرض أرضي بفرضي
تفاح طلع في ارضنا مزروع
غريب الشكل والريحه والنوع
يحرم علينا شهيته
وولادنا ما تكله
وبيعه في سوق الخضره ممنوع
يا صبايا هزوا النخل بكفايه
وافرشوا الحصير ع الجسر
ومدوا حيفان اديكم
واشربوا من شط القنايه
اتعلموا حروف الكلام
ورقة وقلم ومرايا
واحكولهم حواديت الغول
والأرنب الغضبان
والأسد والفار
وكيف الفيل بياكل فول
وخلوا الكلام مذوق
بس يكون معقول
وبرغم الكلام والقول
بحبك
واحب رضاكي
وحارب خفافيش الليل
لو تطير بسماكي
بحبك
برغم اللي يجري وجاري
بحبك يا سمره
شمسي وليلي ونهاري
بحبك
ولازم احبك
ولو فيكى عيب
أخبي وأداري
رائعة الشاعر المصري الكبير
د. عبدالغني مصطفي عبدالغني
من ديوان " حكاوي على وتر الراوي " 1999
الشاعر و الكاتب المسرحي الكبير د. عبدالغني مصطفي عبدالغني هو واحد من اهم شعراء العاميه وكتاب المسرح في مصر . المولود في 4 يوليو 1955 وتوفي في 24 يناير 2021 إثر تعرضه لوباء كورونا .
وله تأثير ادبي شامل كبير في محافظة الغربية و مدينة كفرالزيات . أصدر عدة كتب في الشعر و المقال و المسرح أهمها ديوان " حكاوي على وتر الراوي " و " يوميات عامل ما بيفهمش " و مسرحيتان للأطفال " الغول و بستان الأحلام " .
وبرغم الكلام والقول
ردحذفبحبك
واحب رضاكي
وحارب خفافيش الليل
لو تطير بسماكي
بحبك
برغم اللي يجري وجاري
بحبك يا سمره
شمسي وليلي ونهاري
بحبك
ولازم احبك
ولو فيكى عيب
أخبي وأداري
..... شاعر وطنى و عملاق الله يرحمه يارب