صوره من ديوان بكره أحلى للشاعر مصطفى فريد

كرباج حروف الزمن

عمال يلسوع جتتي

والشوق بيبدر شوك

على طول سكتي

الدمعة صابها الجفاف

فى الجفن وقت اللقا

سكن القلوب إجحاف

وهجرنا صوت الرضا

لما ملكنا الخوف

فى حرف خطفه الوبا

واندفنت السيره

فات عالسطور الوجع

والحيره سابها وراه

حبلى بمليون آآه

النفس تاحت هناك

جوه تلافيف القلق

وسط الزحام

نزلت دموع كل الولاد

فوق السطور المحزنه

جف الكلام

داخل خطوط المعرفه

قلبوا الحقيقه هزار

والقلب اصبح نار

والجهل حلقة زار

جوه عقول متكتفة

والكوديا ليها مزار

ع الدف ومقسمه

كل الحيل تراتيل

ماليه عقولنا غيوم

يكفيكوا شر النوم

السطر صار مغموم

دوبان شراع الامل

مع قلع كان ملحوم

طلع نصيبي وقسمتي

والموج على كتاف النهار

زاد من قساوة محنتي

الملح فار جوه العيون

فورانه نار بتخض

شيب رمال الشطوط

والصخر من عجزه استجار

والهموم لساها بتعافر تقوم

انا قلت ناويه ع الرحيل

طلع الرحيل محموم

ماسك بقوة فى جتتى

وغنوة الموت الشجى

نعسانه فى لحن الغياب

يا طوووول عذاب الحرف

لو من غير نياب يصبح لقيط

فوق سطره جثة مهمشه

ملفوف بأوهام الظروف

ميت على سطر العفن

من غير كفن