ضمة قبر للشاعرة الكبيره سماح مشعل

 ضمة قبر للشاعرة الكبيره سماح مشعل

 

مشينا خلاص وودعنا اللي فاضل مِنّا ف السكة
ده انا مش حافظة غير طريقين
طريق شارع بيجمعنا
وشارعنا اللي فيه بيتنا
مشينا خلاص ومتفقين نفارق بعض
لا هو انت بجد قد البُعد؟
طب إستني هقولك كلمتين يمكن
تسيب السكه مفتوحه
ده انا والله مجروحة
ف ماتسيبنيش
مٍش إنت كنت بتهزر وقولت : بموت
صرخت وقولت أبوس إيدك بلاش الموت
لمين راح أعيش
وكنا بنحكي حدوته
عن البنت اللي هنجيبها
وتطلع شبهي امورة
وهتقول يا اختي كتكوته
وواد أسمر
يقولك بابا ونهزر
ونكتب شِعر ونغني
ف بلكونة بزرع أخضر
ونشرب شاي سوا ع العصر
وتحضني وهتقولي هجيب لك فيلا
لا واللهَ مقامك قصر
حتبعد ليه؟
واعيش إزاي في عمري الجاي
خلاص شكلك نويتها خلاص
صحيح باين عليك نَسّاي
ولّا مَسّ الكلام قلبك
ولا باس الحنين راسك
عشان ترجع بإحساسك
لحب كبير
نصادفه في عمرنا مره
ده حتي ماكنش في الأساطير
ف روح مطرح ماروحك تهوي وإنساني
وسيبني لوحدي بشرب مُر أحزاني
وتوه في الدنيا مع ناسك
وهدعي كل طلعة شمس
لتشرب م الهنا كاسك
وتبقي كبير وسيِد الكل
ما انا مااقدرش أدعي عليك
ولا قلبي شايلك غِلّ
ما اهو انت  في قلبي زي إبني
وهي الأم كت تقدر تقول ياابني
يارب تموت!!
ده مش مظبوط
 ولو تضطر
تقول قلبي عليك مفطور
وقلبك ليه عليه حجر
ف روح مطرح ماروحك تهوي
روح افرح
 وحِب وعيش
وانا برضه كمان راح اروح
وبرضه ح أعيش
كتمثال شمع
بيتكحل تراب رجلك
ويتزوق لآلئ دَمْع
ما ناس بتروح وناس تيجي
وناس بتموت وناس تحيا
وانا العايشة مع عيونك
وروحي معاك
 وانا في ناحيه
ويا " أيوب" خلاص نفدت جبال الصبر
وعايشه سنين جسد ميت
وروحك ليا كانت قبر
ده حتى القبر له ضمه
وانا ضلوعك بعيد عني
                                  ماضمتنيش